Парламент "Қазақстан Халық кеңесі" туралы конституциялық заңды екі оқылымда қарап, мақұлдады.
Құжат Қазақстан халқы Ассамблеясы мен Ұлттық құрылтайдың орнына жаңа консультативтік орган құруды көздейді. Кеңестің ұйымдық құрылымы мыналарды қамтиды:
- сессия – негізгі шешімдер қабылдайтын жоғары орган;
- төралқа – сессиялар аралығында жұмыс істейтін тұрақты алқалы орган;
- комитеттер мен комиссиялар – жекелеген бағыттарды пысықтайтын топтар;
- хатшылық – талдамалық сүйемелдеуді жүзеге асыратын мемлекеттік орган.
Халық кеңесінің құрамына этномәдени бірлестіктердің, қоғамдық ұйымдардың, коммерциялық емес сектордың, мәслихаттар мен қоғамдық кеңестердің өкілдері кіреді. Әр топқа 42 орыннан бөлінеді.
Халық кеңесі мүшелерінің өкілеттік мерзімі төрт жыл болады. Төраға да төрт жыл мерзімге президенттің ұсынысы бойынша немесе кеңес мүшелерінің кемінде үштен бірінің бастамасымен сайланады. Бір адам бұл қызметті екі реттен артық атқара алмайды.
Органның өкілеттіктеріне мыналар жатады:
- ішкі саясат мәселелері бойынша ұсыныстар мен ұсынымдар әзірлеу;
- заң шығару бастамасы құқығы арқылы заң шығару процесіне қатысу;
- референдум өткізу туралы ұсыныстар енгізу;
- қоғамдық талқылаулар ұйымдастыру;
- қоғамдық бақылауға қатысу;
- Астанада Әлемдік және дәстүрлі діндер лидерлерінің съезін ұйымдастыру.
Сондай-ақ заң жобасы мемлекеттік органдар мен лауазымды тұлғаларды Халық кеңесінің ұсынымдары мен ұсыныстарын қарауға міндеттейді.
