"Қазақанимация" 2022 жылы көрерменге 10 мультфильм ұсынады

Мәдениет және спорт министрі Дәурен Абаев facebook желісінде Шәкен Айманов атындағы "Қазақфильм" акционерлік қоғамы жанынан "Қазақанимация" шығармашылық бірлестігін құру жұмыстары қалай жүріп жатқанын баяндады.

Министрдің жазуынша, бұған дейін анимациялық пилоттық жобалардың сценарийлеріне байқау ұйымдастырылса, қазір ұсынылған жобаларды іріктейтін сараптамалық кеңес құрылып жатыр.

"Әлемнің бірнеше жетекші анимациялық студиясынан шетелдік маман тарту арқылы жыл соңына дейін алғашқы 10 пилоттық жобаны көрерменге ұсынуды көздеп отырмыз", – деді Дәурен Абаев.

---

Оқи отырыңыз: 

• "Қазақ ертегілері де қорқынышты ғой". Вице-министр Nickelodeоn-ды қазақша сөйлету туралы пікір білдірді
• "Субтитр қазақ тілінің мәртебесін түсіреді". Қазақстанның кино нарығы туралы дубляж режиссерімен сұхбат

---

Оның хабарлауынша, шығармашылық бірлестіктің жұмыстары арқылы ұлттық анимацияның бәсекеге қабілеттілігін арттырып, ол өнімдерді үлкен прокатқа шығару жоспары бар.

"Заман көшінен қалмай, білімді де білікті шығармашыл жастарымызды қолдап, жаңа идеялар мен тың бастамаларға ыңғайлы алаң жасауымыз қажет. Аудитория сұранысын қанағаттандыратын сапалы контент қалыптасырып, шетелдік әріптестермен тығыз байланыс негізінде қазақ анимациясын халықаралық дәрежеге көтереміз деп сенемін", – деді министр.