Президент Құрылтайдың келесі басқосуын Түркістанда өткізуді ұсынды

Қасым-Жомарт Тоқаев Ұлттық құрылтай туралы бастаманы қолдаған жандарға ризашылығын білдірді.

"Біз бүгін құрылтай жұмысының негізгі бағдарын айқындадық. Бұл құрылым демократия құндылықтарын орнықтыруға зор үлес қосары сөзсіз. Құрылтай жұмысы мұнымен шектеліп қалмайды. Біз жыл сайын тұрақты түрде кездесіп тұрамыз", – деді президент.

Сонымен қатар мемлекет басшысы келесі басқосуды киелі Түркістанда өткізуді ұсынды.

"Қазақ даласында ел тағдыры шешілген тарихи орындар аз емес. Ұлытаудан бөлек, Ордабасы, Мәртөбе, Күлтөбе сияқты қастерлі жерлеріміз бар. Мен келесі басқосуды киелі Түркістанда өткізуді ұсынамын. Құрылтайдың әр аймақта өту сол өңірдің дамуына серпін береді. Оның мүшелері әр жолы бір өңірдің тыныс-тіршілігімен танысады", – деді президент.