24 сәуірде Қазақстан-Чехия арасында меморандумға қол қойылды.
Елімізге Пржевальский жылқысын жерсіндіру бойынша Қазақстан-Чехия арасында меморандумға қол қойылды. Бұл туралы Орман шаруашылығы және жануарлар дүниесі комитеті төрағасының орынбасары Данияр Тұрғамбаев мәлімдеді.
Оның айтуынша, жылқылар Прагадан жеткізіледі.
"Биыл 24 сәуірде елімізге Пржевальский жылқысын жерсіндіру бойынша Қазақстан-Чехия арасында меморандумға қол қойылды. Жылқылар Прага зообағынан ерекше қорғалатын табиғи аумақтарға әкелінеді" – деді Данияр Тұрғамбаев.
Меморандум еліміздегі жабайы табиғатты қорғау саласындағы өзара ынтымақтастықты кеңейтуге және жануарлар әлемінің жойылып бара жатқан түрлерін сақтауға мүмкіндік береді.
