Мәжіліс депутаты Ерлан Саиров пластикалық хирургия және эстетикалық медицина саласындағы қауіпсіздік мәселесіне қатысты депутаттық сауал жолдады.
Депутат соңғы уақытта Ақтау мен Алматы қалаларында липосакциядан кейін пациенттердің қаза табуына байланысты болған қайғылы жағдайлар қоғамда үлкен алаңдаушылық туғызғанын атап өтті. Оның айтуынша, мәселе жекелеген оқиғалар шеңберінен шығып, азаматтардың қауіпсіздігіне, медициналық қызмет сапасына және мемлекеттік бақылаудың тиімділігіне қатысты жүйелі проблемаға айналған.
Сауалда 2024 жылы Мәжіліс депутаттары заңсыз медициналық қызмет, жалған мамандардың әрекеті және пластикалық хирургия мен косметология саласындағы бақылаудың әлсіздігі мәселесін көтергені еске салынды. Үкімет өз жауабында бұл салада елеулі заңбұзушылықтардың бар екенін мойындаған. Атап айтқанда, 2023 жылдың өзінде заңсыз медициналық қызмет үшін 674 әкімшілік хаттама толтырылған. Сонымен қатар сапасыз косметологиялық және пластикалық процедураларға қатысты шағымдар саны екі есеге жуық өскен. Тексерілген жағдайлардың 60 пайыздан астамында заңбұзушылықтар расталған.
Депутаттың мәліметінше, бүгінде Қазақстанда пластикалық хирургия қызметін көрсететін 260-қа жуық медициналық ұйым жұмыс істейді. Ал эстетикалық медицина нарығының айналымы ондаған миллиард теңгеге жеткен.
Еділ Саиров жаңа қайғылы оқиғалар мәселенің әлі күнге дейін шешілмегенін көрсететінін айтты. Оның сөзінше, қауіп тек заңсыз кабинеттерден емес, лицензиясы бар жеке медициналық орталықтардан да туындап отыр.
"Әдемі жарнамалар мен "жеңіл әрі қауіпсіз процедуралар" туралы уәделердің артында өрескел заңбұзушылықтар мен адам өміріне деген жауапсыздық жасырынуы мүмкін", – деді депутат.
Сондай-ақ ол кейбір медициналық ұйымдардың өрескел заңбұзушылықтар анықталғаннан кейін қызметін жаңа заңды тұлғалар арқылы жалғастырып жатқанына алаңдаушылық білдірді. Мұндай жағдайда клиниканың атауы өзгергенімен, мекенжайы мен қызметкерлері сол күйінде қалуы ықтимал екенін атап өтті.
Депутат липосакцияның қарапайым косметологиялық қызмет емес, ауыр асқынуларға алып келуі мүмкін күрделі хирургиялық араласу екенін еске салды. Оның ішінде тромбоэмболия, май эмболиясы және анафилаксиялық шок секілді қауіптер бар.
Осыған байланысты Еділ Саиров пластикалық хирургия және эстетикалық медицина саласында қызмет көрсететін жеке медициналық ұйымдарға кешенді тексеру жүргізуді және лицензия беру тәртібін және заңбұзушылық анықталғаннан кейін қайта ашылатын клиникаларды бақылауды күшейтуді ұсынды.
