Әлеуметтік желілерде некені белгілі бір мерзім сайын қайта тіркеп, оның қолданылу мерзімін ұзарту қажет деген алаяқтық сипаттағы жалған хабарлама таралып жатыр. Бұл туралы Әділет министрлігінің ресми өкілі Талғат Уәли мәлімдеді.
Оның айтуынша, Қазақстанның неке-отбасы заңнамасында мұндай талап жоқ. Неке бір рет тіркеледі және оның белгіленген қолданылу мерзімі болмайды. Сондықтан оны қайта тіркеу немесе мерзімін ұзарту қажет емес.
Талғат Уәлидің түсіндіруінше, неке ерлі-зайыптылардың біреуінің немесе екеуінің өтініші бойынша бұзылуы мүмкін. Сондай-ақ заңда көзделген өзге де жағдайларда неке тоқтатылады.
"Неке тек тіркеуші орган арқылы немесе сот тәртібімен бұзылады", – деп түсіндірді ведомство өкілі.
Оқи отырыңыз: Қазақстанда алаяқтар Beeline, Kcell және Activ абоненттеріне 150 мың жалған SMS жіберген
Осыған байланысты министрлік азаматтарды әлеуметтік желілердегі мұндай хабарламаларға сенбеуге шақырды. Сондай-ақ күмәнді хабарламалардағы сілтемелерге өтпеу және жеке деректерді бөгде адамдарға бермеу керектігін ескертті.