Қазақстан президенті еліміздің басты нышандарының маңыздылығына тоқталып, барша отандастарымызды айтулы мерекемен құттықтады.
"Баршаңызды Мемлекеттік рәміздер күнімен шын жүректен құттықтаймын! Бұл – қасиетті Отанымыз – Қазақ елінің әрбір азаматы үшін маңызы ерекше мереке. Біз осы күні байрағымызды биікке көтереміз. Сол арқылы еңселі, егемен ел екенімізді күллі әлемге паш етеміз. Қастерлі рәміздеріміз – ұлт құндылықтарының жарқын символы. Мемлекетіміздің әр нышаны халқымыздың болмыс-бітімінің көрінісі саналады", – деді президент.
Оқи отырыңыз: Мемлекет басшысы: Шын патриот адам көзбояушылыққа бармайды, ел мүддесі үшін еңбектенеді
Президенттің айтуынша, Көк ту, Елтаңба және Әнұран – біздің тәуелсіздігіміздің мызғымас негізі және әрбір азаматтың мақтанышы. Оларды қастерлеу – отаншылдық пен мемлекетшілдіктің басты белгісі.
"Елтаңба – елдігіміздің айшықты белгісі. Әнұран – азаттығымыздың айбынды үні. Көк Туымыз – Тәуелсіздік тұмары. Төбемізге көтеріп, қадір тұтатын осы үш рәмізді мемлекеттігіміздің мызғымас үштағаны десек, артық болмайды. Тарихқа үңілсек, жұртымыз әрқашан бір тудың астына жиналып, ынтымақ-бірлігін сақтай білген. Қазір де еліміз ауызбіршілігін нығайтып, алға қарай сеніммен қадам басып келеді", – деді Қасым-Жомарт Тоқаев.