Қазақстан халқының орташа жасы 31,8 жасты құрады. Ұлттық статистика бюросының мәліметінше, 20 жыл көлемінде азаматтардың орташа өмір сүру жасында айтарлықтай өсім жоқ. Мәселен соңғы 2 жылда орташа өмір сүру жасы небәрі 0,1 жылға ұзарыпты, деп хабарлады 31 арнаның Информбюро ақпараттық бағдарламасы.
Осыдан он жыл бұрын мемлекеттік басқару саласында жұмыс істейтін қызметкерлердің орташа жасы 37,2 болса, қазір бұл көрсеткіш 38 жас. Сондай-ақ, осы жылғы есеп бойынша Қазақстанда 6,5 миллионға жуық бала мен 18 жасқа толмаған жасөспірім тұрады. Олардың 51,5 пайызы ер балалар, ал қалған 48,5 пайызын қыздар құрайды.
Экономист Мақсат Серәлінің пікірінше, орташа жасы 40 жастан асып жығылатын Еуропа елдерімен салыстырғанда Қазақстан өте жас мемлекеттердің қатарына жатады. Ал бұл экономикалық тұрғыдан елге инвестиция салу үшін өте қолайды. Сондай-ақ, зейнетақы жүйесі үшін де бұл көрсеткіштің тиімділігі зор.
"Жылдан жылға жастардың саны өсіп келеді. Биылдың өзінде Қазақстанда 18-ге толғандардың саны 350 мыңнан асты. Олар алдағы уақытта еңбек нарығына қосылып, болашақта зейнетақы жүйесіне өте жақсы активтер алып келеді", – деді экономист Мақсат Серәлі.
Оқи отырыңыз: 25 жылда Қазақстан өңірлерінде халық саны қалай өзгерді? Инфографика
