Қазақстанда "онлайн достың" құны – сағатына 4 мың теңге

Қазақстандық жарнама сайттарында "ақылы дос" қызметін ұсынушылар бар. Олардың қызмет ақысын төлесе, сырыңызды сағаттап тыңдап, көңіліңізді табуға тырысады, деп хабарлады 31 арнаның Информбюро ақпараттық бағдарламасы.

Қазақстанда бұл қызметке сұраныс бар екен, сондықтан мұндай жарнама саны да еселеп артқан. Бұл мәселені зерттеген арна тілшісі Диана Сапарқызының хабарлауынша, "ақылы дос" қызметінің онлайн да, офлайн да түрі бар екен. Қызмет ақысы – сағатына 4 мың теңге. Көбіне бұл қызмет түріне 30-40 жас аралығындағы адамдар жүгінетіні белгілі болды.

"Менімен ақшаға дос болатындардың көбі кәсіпкерлер. Жақсы табыс табатындар әдетте жалғызсырап жүреді. Олар қарапайым адамдармен әңгімелесуге зәру десем болады. Өзіме қызметіме жүгінгендермен барлық тақырыпта әңгіме құрамын", – дейді "ақылы дос" қызметін ұсынушылардың бірі Александр Ляпин.

Оқи отырыңыз:

• "Орысқұл, хайпожор, мәңгүрт". Әлеуметтік желіде пікір жазғанда нені ескеру керек?
• 2022 жылы "Бастау Бизнеске" қатысушыларды қандай өзгерістер күтіп тұр?

Психологтар бұл қызметке сұраныстың артуын адамдардың бала кезінде ата-ана мейіріміне бөленбегенімен байланыстырады. Сондай-ақ, әке-шешесінен үнемі кемсіту сөздер естіп, өзіне деген сенімі төмендегендер де "бейтаныс" дос іздейді екен.

"Ақшаға дос жалдау - жалғыздықтың белгісі. Мұндай адамдардың өз-өзін бағалауы төмен болып келеді. Олар адамдармен қарым-қатынас орнатуға қорқады. Сондықтан, өздерін алшақ ұстап, жалғыз жүргенді жөн көреді. Ал басына іс түскен кезде өкініштісі қасынан ешкім табылмай қалады", – дейді психолог Александр Пак.

Мамандардың айтуынша, жалғызсырап жүргендердің көбі әлеуметтік желіде белсенді. Бұл адамдар интернет арқылы танысуға бейім, алайда шынайы өмірде адамдармен қарым-қатынас құрудан қорқатынын көрсетеді. Сондықтан, қорқыныштан арылу үшін бейтаныс адаммен кездеспей, кәсіби психологтың көмегіне жүгінуге кеңес береді.