"Қабырғасы қақырап, жылу ұстамайды". Алматыда жаңа мектеп 2 жылда апатты күйге түскен

Мектеп құрылысында өрт қауіпсіздігі талаптары да ескерілмеген.

Алматының Мамыр ықшам ауданындағы №202 мектеп-гимназиясының қабырғасы 2 жылға жетпей қақырап, үлкен сызат түскен. Мектеп басшылығы құрылыс жұмыстарын сапасыз жүргізген мердігерге наразы, деп хабарлады Astanatv.

Гиманазия директоры Болат Жанайханұлы бұл мәселені бірнеше рет көтерсе де, нәтиже болмағасын құзырлы орган өкілдерінің қатысуымен арнайы рейд ұйымдастырды.

"Бұл бірнеше рет айтылған мәселе еді, әлі шешімін таппапты. Мердігер компания біраз жұмысты абыр-сабыр жасаған", – дейді Алматы қалалық мәслихатының депутаты, Аmanat партиясы қалалық филиалы жанындағы қоғамдық кеңес төрағасы Ерболат Қасымов.


Оқи отырыңыз: Алматыда мұғалімдердің орташа жалақысы 320 мың теңгеге жетеді


Мектеп басшысының айтуынша, мердігер 1 жылдық кепілдік берумен шектелген. Екі жыл бұрын ғана салынған ғимараттың қабырғасында сызат көп. Ал іргетасы шөгіп барады.

"Мұндай үлкен құрылыста 2 жылдық кепілдік берілуі керек. Бұл жақта тек бір-ақ жыл берілген. Мектептің өрт қауіпсіздігі жүйесі жоба бойынша жасалмаған және мектепте орналасқан өрт гидрантында су жоқ. Өрт болған жағдайда қауқарсызбыз", – дейді №202 мектеп-гимназиясының директоры Болат Жанайханұлы.

Рейд қатысушыларының айтуынша, жаңа мектептің мұнан басқа да кемшілігі көп. Оқушылар суық кабинетте білім алуға мәжбүр.

"Мен адамдар жіберіп, жөндетуге уәде бердім. Суық болмауы үшін ескірген, бұзылған жерлердің бәрін қалыпқа келтіреміз. Батареяның жылуына келсек, біз жобадан тыс ешнәрсе жасай алмаймыз, бәрі жобаның аясында салынды", – дейді мердігер компания басшысы Қайрат Сандықбаев.

Жаңалықты жарнамасыз оқыңыз. iOS және Android жүйесіне арналған informburo.kz мобильді қосымшасын жүктеңіз.

Бөлісу:

  Егер мәтінде қате болса, оны белгілеп, Ctrl+Enter батырмасын басыңыз

  Егер мәтіндегі қатені смартфонда көрсеңіз, оны белгілеп, «Қатені хабарлау» батырмасын басыңыз

Серіктестер жаңалықтары