Ішкі істер министрлігі жазғы демалыс қарсаңында оқушылар мен студенттерге үндеу жасап, күмәнді жұмыс ұсыныстарынан сақ болуға шақырды. Бұл туралы Polisia.kz хабарлады.
Ведомство мәліметінше, каникул кезінде интернет пен әлеуметтік желілерде "жеңіл әрі тез табыс" ұсынатын хабарландырулар көбейеді.
Алайда мұндай ұсыныстардың артында есірткі тасымалдау, тарату, насихаттау және жарнамалау сияқты заңсыз әрекеттер жасырынуы мүмкін.
"Бұл жай ғана қауіп емес, бұл – қылмыс. Есірткіге қатысты қылмыстар үшін қылмыстық жауапкершілік 16 жастан басталады. Ең қатаң жаза өмір бойына бас бостандығынан айыруға дейін қарастырылған", – деді Қуандық Әлжанов.
Оқи отырыңыз: Алматы әуежайында шетел азаматы есірткімен ұсталды. Күдікті өмір бойына сотталуы мүмкін
Оның айтуынша, бір ғана "жеңіл табыс" адамның бүкіл өміріне кері әсер етуі мүмкін.
ІІМ жастарды күмәнді жұмыс ұсыныстарынан бірден бас тартуға шақырды.
"Жылдам табыс иллюзиясы үшін өз болашағыңызды қатерге тікпеңіз. Еркіндік ақшадан қымбат, ал болашақ уақытша пайдадан маңызды", – деді Қуандық Әлжанов.