Фармацевт дәріні шатастырған: 3 жасар бала антидепрессанттардан уланды

Павлодарда фармацевт дәрі-дәрмектерді шатастырып алды. Салдарынан 3 жасар бала антидепрессанттарға уланды, деп хабарлады Polisia.kz сайты. 

Полицияға баланың улану фактісі бойынша қоңырау келіп түсті. 

"Қала тұрғыны Лермонтов көшесіндегі дәріханалардың бірінен дәрігер жазып берген рецепт бойынша 3 жасар балаға дәрі-дәрмек сатып алған. Дәріні ішкен соң бала өзін нашар сезініп, құса бастаған. Павлодар қаласының тұрғыны дереу жедел жәрдем шақырып, бала ауруханаға "антидепрессанттардан улану" диагнозымен жатқызылған. Белгілі болғандай, фармацевт дәріні қала тұрғынына қателікпен сатқан", – деп хабарлады Павлодар облысы ПД баспасөз қызметі. 

Аталған факті бойынша Қылмыстық кодекстің 317-бабы ("Медицина немесе фармацевтика қызметкерінің кәсіби міндеттерін тиісінше орындамау") бойынша сотқа дейінгі тергеу жүргізіліп жатыр.

Оқи отырыңыз: Мемлекеттен – 2,5 млн теңгеге дейін. Ана мен балаға берілетін әлеуметтік көмектер қандай?