Ержан Нүкежанов: Дінге сенбейтін азаматтардың құқығы сенетіндермен тең қорғалуы тиіс

Дін саласында білім алған түлектер ойын ортаға салып, әрі қарай талқылауы үшін комитет жанынан YZ Club атты диалог алаңы құрылды.

Елде жыл сайын дін саласында білім алып шығатын 500-ге тарта студенттің теріс жолға түсіп кетпеуі үшін Қазақстан Республикасы Ақпарат және қоғамдық даму министрлігі дін істері комитеті жанынан арнайы алаң құрылды. Ол жерде жас мамандар дінге қатысты сыни пікірін бөлісіп, талқыға салады. Бұл туралы комитет төрағасы Ержан Нүкежанов мәлімдеді. 

Сондай-ақ, комитет өкілі дінге сенбейтін азаматтардың да құқығы толыққанды қорғалуы үшін арнайы жұмыстар жүргізіліп жатқанын айтты. 

"Дінге сенетін және сенбейтін азаматтардың құқығының тең қорғалғанын қалаймыз. Осыған байланысты әлемдік тәжірибені ескере отырып "Дінге сенбейтіндер құқығы" деген түсінікті енгізгіміз келіп отыр. Біз зайырлы мемлекетпіз. Бізде заң бәрінен биік тұрады. Адамның дініне, конфессиясына, ұлтына қарамастан, заң бәрімізге ортақ. Осыған мақсатты түрде келе жатырмыз және ол заң орындалады", – деді Ержан Нүкежанов.


Оқи отырыңыз: "Жусан" операциясы аясында елге оралған әйелдердің 95%-ы діни теріс көзқарасынан бас тартқан


Сондай-ақ, ол азаматтардың мүлкін теріс жолмен иеленіп алатын діни ұйымдарға тоқталды. Қылмыстық кодексте діни ұйымдар жұмысына қатысты арнайы бап болмаса да, олар "алаяқтық" фактісі бойынша жазаланады. Бұдан өзге ол жас мамандардың діни сауатын арттыру үшін қандай жұмыстар жүргізіліп жатқанын айтып берді. 

"Бізде біразға дейін бір түйіткілді мәселе болды. Жыл сайын дінтану, исламтану, теология мамандықтары бойынша 500-ге тарта студент ЖОО-ны тәмамдайды. Біз осы жас PhD және магистрлермен жұмыс істеп жатырмыз. Олар ойын ортаға салып, әрі қарай талқылауы үшін комитет жанынан YZ Club атты диалог алаңы ашылды. Өзінің сыни пікірін айтамын деуші жас мамандарға осындай алаң беріп отырмыз. Кездесуі болып өтті", – деп қосты Ержан Нүкежанов. 

Мұнымен қатар, Ержан Нүкежанов комитеттің "Халыққа қызмет – маңызды міндет" жобасын жүзеге асыруды бастағанын мәлімдеді. Facebook, Instagram желілерінде ашылған парақша дін төңірегіндегі сұрақтарға жауап береді. 

Поделиться:

informburo.kz в Instagram:

следите за самыми важными новостями в ленте и в сториз

Если вы нашли ошибку в тексте, выделите ее мышью и нажмите Ctrl+Enter

Серіктестер жаңалықтары