Қазақстанның бірінші ракеткасы Елена Рыбакина Римде WTA 1000 турнирінің жеңімпазы атанды. Финалдағы қарсыласы әлемнің 47-ракеткасы, украиналық Ангелина Калининаны 6:4, 1:0 есебімен жеңді. Екінші партияның екінші геймінде Калинина жарақат алуына байланысты ойынды жалғастыра алмады.
Қазақстандық теннисші финалға дейін итальялық Жасмин Паолиниді (7:6, 6:1), ресейлік Анна Калинскаяны (4:3, қарсыласы жарыстан шығып қалды), чех Маркет Вондроушованы (6:3, 6:3), әлемнің бірінші ракеткасы поляк Ига Швёнтекті (2:6, 7:6, 2:2, қарсыласы жарыстан шығып қалды) және латвиялық Елена Остапенконы (6:2, 6:4) жеңді.
Continuing her stellar season 🏆
— wta (@WTA) May 20, 2023
Elena Rybakina | #IBI23 pic.twitter.com/VjNW5zwEGN
Римдегі WTA 1000 турнирінің жүлде қоры биыл 3,5 млн евроны құрайды. Турнир жеңімпазы Елена Рыбакина 521 мың евро тапты. Оған қоса 1000 рейтинг ұпайын алып, әлемдік рейтингіде төртінші орынға көтеріледі.
Оқи отырыңыз: Елена Рыбакина биыл үшінші рет WTA 1000 турнирінің финалына шықты
Елена Рыбакина осы маусымда WTA 1000 турнирлер сериясының финалына үшінші рет шығып отыр. Қазақстандық теннисші Индиан-Уэллсте жеңіске жетсе, Майамиде жеңіліс тапты. Жыл басында Елена Australian Open финалына шықты.
Қазақстандық теннисші осы маусымда WTA 1000 турнирлеріндегі жеңіс саны бойынша рекорд жасады. Рыбакина қарсыласын 19 рет жеңсе, Арина Соболенко мен Ига Швёнтектің әрқайсының еншісінде 15 жеңістен бар.
