Қазақстан азаматтығын алу үшін 2023 жылдан бастап қазақ тілі, Қазақстан тарихы мен Конституциядан емтихан тапсыру енігізіледі. Бұл туралы еңбек және халықты әлеуметтік қорғау министрі Тамара Дүйсенова үкімет кулуарында айтты.
"Қазір алыс шетелдерден құжатында ұлты екені көрсетілмеген этникалық қазақтар келіп жатыр. Осыған байланысты қазақ тілі, Қазақстан тарихын базалық деңгейде білу бойынша алдын ала тақырыптық регламент дайындалды. Келесі жылы сынақтан өткіземіз. Бұл көп жағдайда этинкалық қазақтарға қатысты", – деді Тамара Дүйсенова.
Министрдің айтуынша, емтихан азаматтардың көшіп келген аймағында өтеді. Қазіргі уақытта ондай жеті аймақ қарастырылған.
Оқи отырыңыз: Азаматтық алу үшін мемлекеттік тілді білуді міндеттеу: Шетелдегі қазақтар ана тілін біле ме?
Еске салайық, бұған дейін Ішкі істер министрі Марат Ахметжанов Қазақстан азаматтығын алу үшін мемлекеттік тілді, тарих пен Конституцияны білу міндетті болатынын айтқан еді.
