Чемпиондар лигасы: "Арсенал" мен "Қайрат" ойынына билеттер 21 қарашада сатыла бастайды

Ағылшынның "Арсенал" футбол клубы Чемпиондар лигасының жалпы кезеңі аясында Алматының "Қайратына" қарсы өтетін ойынға билеттер сатылымының басталатынын мәлімдеді, деп хабарлайды sports24.kz.

Клубтың ресми сайтындағы мәліметке сәйкес, матч "В" санатына жатқызылған. Билеттердің бағасы 44,80–80 фунт стерлинг (шамамен 30–50 мың теңге) аралығында белгіленген. Алдын ала сатылым 21 қарашада басталса, жалпы сатылым кейінірек ашылады.

"Арсенал" мен "Қайрат" арасындағы кездесу 2026 жылғы 29 қаңтарында Лондондағы "Эмирейтс" стадионында өтеді.

Еске сала кетсек, бұған дейін алматылық команда "Интермен" сырт алаңда ойнап, 1:2 есебімен жеңіліп, италиялық баспасөзді өз ойынымен таңғалдырған болатын.

Төрт тур қорытындысы бойынша "Қайрат" турнир кестесінде бір ұпаймен 34-орында тұр.