"Бөлуге, беруге және біріктіруге болмайды". Отбасы банкі балаларға арналған депозиттің шарттарын түсіндірді

2 тамыз 2023, 11:44 Зарина Қаһарман Авторға хат жазу قازاقشا Qaz

Балаларға арналған "Арнау" депозитіне кем дегенде 10 жыл ішінде шарттық соманың 50 пайызын жинақтап, үй несиесін алуға болады.

"Арнау" депозитінің жылдық сыйақы мөлшері 2 пайыз, ал мемлекет сыйлықақысымен 6 пайыз болады. Бұл туралы Отбасы банкінің Instagram парақшасында жарияланды.

"Сіздің кішкентайыңыз ересек болған кезде табысы төмен болса да ең төменгі ставка бойынша тұрғын үй несиесін ала алады. Ол үшін "Арнау" депозитінде кем дегенде 10 жыл ішінде шарттық соманың 50 пайызын жинақтап, бағалау көрсеткішін 48 балға жеткізу қажет", – деп жазылған хабарламада.

Депозитті 18 жасқа дейінгі кез келген жастағы балаға ашуға болады. Мысалы, 15 жасында депозит ашып, ол 25 жасқа толғанда тұрғын үй несиесін 2 пайызбен рәсімдей алады. "Арнау" депозитін заңды өкілдер (ата-аналар, қамқоршылар) немесе тіпті ата-әжелер, бауырлар, әпкелер мен ұйымдар аша алады.

Ескерту: "Арнау" депозитін бөлуге, беруге және біріктіруге болмайды.

Оқи отырыңыз: Ата-анаға кеңес: Баланың жоғары білім алуына қалай ақша жинауға болады?