Биылғы бірінші тоқсанда Қазақстанның жалпы ішкі өнімі 3 пайызға өсті

Қазақстанның 2026 жылғы I тоқсандағы (қаңтар – наурыз) жалпы ішкі өнімінің нақты өсімі 3 пайызды құрады. Бұл туралы премьер-министр Олжас Бектенов мәлімдеді.

Оның айтуынша, бұған дейін президент экономиканың сапалы әрі тұрақты өсімін қамтамасыз етуді тапсырған. Бұл міндет өңдеуші өнеркәсіпті дамыту, инвестициялық белсенділікті арттыру және өндірістерді технологиялық жаңғырту арқылы жүзеге асырылып жатыр.

"Осы кезеңде жалпы ішкі өнімнің нақты өсімі 3 пайызды құрады. Бұл көрсеткіштің шикізаттық емес сектордағы, атап айтқанда өңдеу өнеркәсібі, көлік, құрылыс және сауда салаларындағы тұрақты өсім есебінен қамтамасыз етілгенін атап өткен жөн. Сыртқы экономикалық жағдайлардың нашарлауына қарамастан, дәл осы шикізаттық емес сектор өзінің тұрақтылығы мен бәсекеге қабілеттілігін көрсетуде", – деді Олжас Бектенов Үкімет отырысында.