Білім грантына өтініш беру 13 шілдеде басталады. Қандай құжаттар қажет

Биыл мемлекеттік білім грантына құжаттар 13-20 шілде аралығында қабылданады. 

Осы ретте Ұлттық тестілеу орталығы байқауға қатысу үшін қажетті құжаттар тізімін жариялады. 

Олар: 

• жеке куәлік;
• ҰБТ сертификаты;
• 3х4 көлеміндегі фото;
• орта білім туралы аттестат немесе колледж түлектері үшін диплом;
• жеңілдетілген санат бойынша конкурсқа қатысу үшін растайтын құжаттар;
• B167 "Ұшу аппараттарын және қозғалтқыштарды ұшырып пайдалану" мамандығы үшін дәрігерлік ұшу-сараптамалық комиссиясының медициналық куәландыруы керек.

Еске салайық, 2026-2027 оқу жылына бакалавриатқа 75 371 мемлекеттік грант бөлінді. Мамандықтар бойынша гранттар бөлінісін Ұлттық тестілеу орталығының ресми сайтынан көруге болады.

Құжаттарды Электрондық үкімет порталы немесе ЖОО-лардың қабылдау комиссиялары арқылы тапсыруға мүмкіндік бар. 

Грант иелерінің тізімі тамыз айының ортасында жарияланады.