Премьер-министр Олжас Бектенов Абай облысындағы "Семей орманы" мемлекеттік орман табиғи резерватында шыққан өртке байланысты төтенше жағдайлар министрі Шыңғыс Әрінов пен экология және табиғи ресурстар министрі Ерлан Нысанбаевты шұғыл түрде өңірге аттандырды. Бұл туралы Үкіметтің баспасөз қызметі хабарлады.
Үкімет мәліметінше, министрлерге "Семей орманындағы" өртті сөндіру жұмыстарын тікелей үйлестіру жүктелген.
Сонымен қатар премьер-министр жақын маңдағы елді мекендердің қауіпсіздігін қамтамасыз етіп, өрттің одан әрі таралуына жол бермеуді тапсырған.
Сағат 16:00-дегі мәлімет бойынша, тілсіз жаумен күреске 400-ден астам адам мен 100-ге жуық техника тартылған. Өрт ошағына әуеден 100 тоннадан астам су төгілген.
Үкіметтің мәліметінше, өңірдегі жедел штабтың жұмысы премьер-министр Олжас Бектеновтің жеке бақылауында.