"Баласы күйеуінен емес" деп көршісі туралы қауесет таратқан қарағандылық зейнеткер жарты миллион теңгеге жуық айыппұл төлейтін болды. Сот кейуананы біреудің ар-намысы мен қадір-қасиетіне нұқсан келтіретін жалған мәлімет таратқаны үшін кінәлі деп таныды. Бұл туралы 31-арнаның "Информбюро" ақпараттық бағдарламасы хабарлады.
34 жастағы қала тұрғыны қарияның үстінен полицияға арызданған. Учаскелік инспектор 66 жастағы зейнеткерді анықтап, істі сотқа жолдады. Жала жапқан әже өз кінәсін толық мойындады. Заңға сәйкес, жала жапқаны үшін 690 мың теңге көлемінде айыппұл салу немесе 15 тәулікке дейін әкімшілік қамауға алу жазасы қарастырылған. Алайда судья жауапкершілікті жеңілдететін мән-жайларды ескерді.
"Сотта барлық мән-жай, соның ішінде зейнет жасы мен бұған дейін мұндай құқық бұзушылық жасамағаны ескерілді. Осылайша, айыппұл мөлшері 30 пайызға азайтылып, 484 400 теңге көлемінде белгіленді", – деді Қарағанды қаласының әкімшілік құқық бұзушылықтар жөніндегі мамандандырылған сотының судьясы Ғани Кеңес.
Оқи отырыңыз: Зайсанға балық аулауға барған екі балықшының денесі табылды