Азаптау фактісі: Күштік органдардың 39 қызметкері қылмыстық жауапкершілікке тартылады

Азаптаудың алдын алу мәселелері бас прокурордың орынбасары Болат Дембаевтың қатысуымен ішкі істер министрлігінде өткен ведомствоаралық кеңесте талқыланды. Бұл туралы бас прокуратураның баспасөз қызметі хабарлады.

Кешенді шараларды іске асыру жалғасып жатыр.

"Қазіргі уақытта 88 азаматқа қатысты тергеудің рұқсат етілмеген әдістерін қолданғаны үшін күштік органдарының 39 қызметкері қылмыстық жауаптылыққа тартылады. Министрлік басшыларға психологиялық тестілеу өткізу арқылы азаптауды қолдануға бейім қызметкерлерді алдын ала анықтау ұсынылды" – делінген хабарламада.

"Полиция ғимараттары мен мекемелерді тексеру кезінде бейнекамералармен қамтылмаған 5812 учаске мен үй-жайлар, 900 жұмыс істемей тұрған камера анықталды. Ғимараттарды толық жарақтандыруды жыл соңына дейін аяқтау жоспарланып отыр. Аумақтық полиция департаменттерінің, ҚАЖК және ІІМ орталық аппаратының 19 басшысы тәртіптік жауапкершілікке тартылды" – делінген хабарламада.