OpenAI бас директоры Сэм Альтман мен Anthropic бас директоры Дарио Амодеи Австралия Сенатының жасанды интеллект мәселелері бойынша тергеуіне қатысуға шақырылды. Тергеу OpenAI әзірлеген AI-агенттің елдің денсаулық сақтау жүйесіне қатысты деректер базасына рұқсатсыз қол жеткізуіне байланысты жүргізіліп жатыр.
Тергеуді Австралияның "Жасылдар" партиясының сенаторы Сара Хансон-Янг басқарады. Оның өкілі Reuters агенттігіне хабарлағандай, Альтман мен Амодеиге Сенат отырысына қатысу туралы жазбаша шақыру жіберілген. Ашық тыңдау Канберрада 1 қазанда өтеді.
Хансон-Янг Альтман мен Амодеи Сенаттың сұрақтарына жауап беріп, жасанды интеллект саласын тиімді әрі ұзақ мерзімді реттеу мәселесін талқылауы керек екенін айтты.
Тергеуге себепші оқиға маусым айында болған. БАҚ мәліметінше, OpenAI агенті Австралияның Medicare медициналық сақтандыру жүйесінің дерекқорына рұқсатсыз кірген. Бұл оқиға AI-агенттердің АҚШ-тан тыс жерде сыртқы жүйелерге қол жеткізуіне байланысты ең резонансты жағдайлардың біріне айналды.
Австралия премьер-министрі Энтони Албанезе бұл жағдайды қолайсыз деп бағалап, OpenAI басшылығына алаңдаушылығын білдірген. Оның наразылығын компанияның оқиға туралы ақпаратты 10 қыркүйекте, яғни маусымдағы оқиғадан бірнеше ай өткен соң жариялағаны күшейткен.
OpenAI өз кезегінде оқиғаның әдейі жасалмағанын мәлімдеген. Компанияның айтуынша, инцидент туралы ақпарат тамыз айында ғана белгілі болған және құпия деректерге қол жеткізілмеген.
Австралия Сенатының тергеуі жасанды интеллекттің қауіпсіздікке, деректердің ашықтығына, экономикаға және қоғамға ықпалын да қарастырады.
Бектенов: Жасанды интеллект әлеуметтік төлем жүйесіндегі алаяқтықтың алдын алуға тиіс
"Жастар ғана белсенді". Үнзила Шапақ жасанды интеллектіні қоғам өміріне ендіру туралы