"Аузымнан көбік ақты". Фельдшер демікпесі бар әйелге басқа укол салып жіберген

Жетісу облысында жедел жәрдем қызметкері демікпе дертіне шалдыққан әйелге, қан қысымын көтеретін уколды шатастырып салып жіберген, деп хабарлады 31 арнаның "Информбюро" ақпараттық бағдарламасы.

20 тамыз күні 39 жастағы Светлана Қойшыбаева дем жетіспей, тынысы тарылған соң жедел жәрдем шақыртқан. Келген фельдшер астмаға ем болатын уколдың орнына, қан қысымын көтеретін ерітіндіні салып жіберген. Айтуынша, қан қысымы бірден 160-қа дейін көтеріліп, аузынан көбік аққан.

"Мен бронхиалды астманың ауыр түрімен 6 жылдан бері ауырамын. Оған қоса гипертония диагнозы қойылған. Дем жетпей, жүрегім қысылып әрең отырғанымда маған қан қысымын көтеретін укол салып жіберді. Демікпем аздай, енді қан қысымым қайта-қайта көтеріліп, арнайы аппараттың көмегімен ғана тыныстап отырмын", – дейді Ескелді ауданының тұрғыны Светлана Қойшыбаева.

Оқи отырыңыз: Нұр-Сұлтанда жедел жәрдем көлігі жақындағанда бағдаршамның жасыл шамы жанады

Светлана Қойшыбаева оқиғадан соң көзінің көруі күрт нашарлап, қан қысымы жиі көтеріле беретінін айтады. Айтуынша, оған дем жетіспегенде салынатын эуфиллиннің орнына, қан қысымын көтеретін допамин ерітіндісін салып жіберген. Деректі Жетісу облыстық жедел жәрдем станциясының директоры да растап отыр.

"Фельдшердің айтуынша, сол күні науқастың үйі қараңғы болған. Сол себепті, жедел жәрдемнің арнайы қорабында қатарынан тұрған эуфиллин мен допаминді шатастырып алған. Мұндай қателікке жол берген фельдшердің негізгі еңбек өтілі – 20 жыл. Қазір ол жұмыстан шығарылды", – деді облыстық жедел жәрдем станциясының директоры Савелий Пак. 

Қазір жедел жәрдем басшылығы екі сағат сайын мамандарды науқастың үйіне жіберіп, денсаулығын қадағалап отыруға дайын екенін айтады. Алайда Светлана Қойшыбаева олармен сөйлеспей отырған көрінеді. 

Оқи отырыңыз: "Баланың өңешінде мақтаны ұмыт қалдырған". Дәрігер салғырттығын анықтау мүмкін бе?