Атырауда жылына 800 млн дәрі өндіруі тиіс зауыт ақыры бой көтермеді: 9 жылда бір инвестор табылмаған

Жергілікті әкімдік әлі күнге дейін инвестор табылмай отырғанын алға тартады.

Атырау облысында фармацевтикалық зауыттың құрылысы 9 жылдан бері тоқтап тұр. Өңірдің экс-әкімі Бақтықожа Ізмұхамбетов зауыт 800 млн дәрілік таблетка, 300 млн капсула, 78 млн ампула, 3 млн қаптама жақпа май және көктамырға құюға арналған 12 млн флакон ерітінді өндіреді деп мәлімдеген болатын. Алайда, құрылысты жүргізуге әлі күнге дейін инвестор табылмаған, деп хабарлады 31 арнаның "Информбюро" ақпараттық бағдарламасы. 

Кәсіпорынның 30 пайызын Атырау әлеуметтік корпарациясы қаржыландырып, он шақты тірек бағанасы ғана тұрғызылған. Кейін корпарация шикіліктің барын сезіп сотқа жүгінген де, қаржысын қайтарып алған. 

"Жобаның бастамашысы Атырау ӘКК 2018 жылы 60 миллион теңгеден астам қаржыны кері қайтарды. Мұнымен қатар, араға бір жыл салып 810 миллионға бағаланған мүлікті берді. 2019 жылы компания барлық берілген соманы қайтарды. Алдағы уақытта Атырау ӘКК бұл жобаны қаржыландырмайды", – деді "Атырау" әлеуметтік-кәсіпкерлік корпорациясы" баспасөз хатшысы Гүлнәз Кәрімжан. 


Оқи отырыңыз: Қазақстанда дәрі-дәрмекке сараптама қалай жүргізіледі және ол не үшін қажет? 


Жергілікті әкімдік зауыт құрылысын жандандыру үшін  әлі де инвестор іздеп жатыр, бірақ қызығушылық танытқан компания жоқ. 

"Зауыт құрылысы тоқтап тұрғаны белгілі, облыс әкімдігімен бірге инвестор іздеп жатырмыз. Алыс және жақын шетелден келетін бизнес және ресми құрылым өкілдеріне ақпарат жеткізілді. Инвестор табылғанда компания басшылығы келіссөз жүргізуге дайын, әзірге инвестор табылмады", – деді Атырау облысы кәсіпкерлік және индустриялық-инновациялық даму басқармасының бөлім басшысы Гүлфайруз Маратова. 

Жаңалықты жарнамасыз оқыңыз. iOS және Android жүйесіне арналған informburo.kz мобильді қосымшасын жүктеңіз.

Тарату:

  Егер мәтінде қате болса, оны белгілеп, Ctrl+Enter батырмасын басыңыз

  Егер мәтіндегі қатені смартфонда көрсеңіз, оны белгілеп, «Қатені хабарлау» батырмасын басыңыз

Біздің Telegram-каналдағы ең көп оқылған жаңалықтар

Серіктестер жаңалықтары