Тасқын жағдайына байланысты, Оқу ағарту министрлігінің шешімімен, аралық және қорытынды атестаттаудан Махамбет ауданындағы барлық мектептер, Жылыой ауданындағы тасқыннан зардап шеккен № 5, 8, 19, 6 мектептердің 5-11 сынып оқушылары босатылды.
"Атырау облысы бойынша, 6376 оқушы аралық және қорытынды атестаттау тапсырмайды. Олардың қатарында Жылыой ауданындағы № 5, 8, 19, 6 мектеп және Махамбет ауданындағы 16 мектептің білім алушылары бар", – делінген хабарламада.
Оқушылардың қорытынды бағасы жылдық бағалары негізінде шығарылады.
Оқи отырыңыз: Түркістан облысында "қыздарға қол жүгіртіп, ұлдарға жұдырық жұмсайтын" мұғалімнің үстінен тексеріс басталды
"Алайда 11 сынып оқушылары ҰБТ тапсырады. 9 сынып бітіргеннен кейін оқушылар арасында колледждерге оқуын жалғастыруға ниеттілер болса, шәкірттер колледждерде қабылдау емтихандарын тапсырады", – деді Атырау облысы білім беру басқармасының мектепке дейінгі және орта білім беру бөлімінің бас маманы Дина Стамғали.
Еске сала кетелік, биылғы оқу жылын Атырау облысында 204 мектепте 148 683 оқушы аяқтап отыр. Оның ішінде, 9 сыныптарда 12 700 оқушы, 11 сыныптарда 6000-ға жуық оқушы бар.
