Астанада жыл басынан бері 7 мыңнан астам жаяу жүргінші жол ережесін бұзған

Елордада жаяу жүргіншілердің қатысуымен болатын жол-көлік оқиғаларын азайту және жол жүру ережесін бұзудың жолын кесу мақсатында “Назар аударыңыз, жаяу жүргінші!” атты жедел-профилактикалық іс-шарасы өткізіліп жатыр, деп хабарлады Polisia.kz.

Әр аптаның жұма күндері полиция департаменті қосымша қызметкерлерін тарта отырып, жаяу жүргіншілердің белгіленбеген жерлерден жолды кесіп өтіп, жол қозғалысы ережелерін бұзу фактілерін анықтау мақсатында “Жаяу жүргінші” атты іс-шара жүргізеді. Тәртіп сақшылары орта есеппен күні бойы жаяу жүргіншілер жасаған 200-300-ге жуық құқық бұзушылықты анықтайды.

"Биыл Әкімшілік құқық бұзушылық туралы Кодекстің 615-бабы бойынша 7094 жаяу жүргінші жауапкершілікке тартылды. Сонымен қатар велосипедшілер, мопедтер мен скутерлердің жүргізушілері де жоғарыда аталған бапқа жатады. 2023 жылдың осы кезеңінде жол қозғалысы ережелерін бұзғаны үшін 550 велосипедші, 198 мопед жүргізуші және 55 мотороллер жүргізушілері әкімшілік жауапқа тартылды. Полицейлер көлік құралдарының жүргізушілерін тәртіпке келтіре отырып, жаяу жүргіншілерге арналған өткелдерден өту ережелерін бұзу, оларға жол беру талаптарын орындамау, жаяу жүргіншілер жолында аялдама және тұрақ ережелерін бұзу фактілерін бақылауда ұстайды", – делінген хабарламада.