Қазақстанда мерзімді әскери қызметін өтеп қайтқан азаматтар үшін жоғары білім алу қолжетімді бола түсті. Енді әскер қатарында болған жастар Ұлттық бірыңғай тестілеуді тапсырмай-ақ, арнайы іріктеуден өту арқылы жоғары оқу орындарына түсу мүмкіндігіне ие.
Бұл туралы Орталық коммуникациялар қызметінде өткен брифингте ҚР Қорғаныс министрінің цифрландыру жөніндегі орынбасары Дархан Ахмедиев мәлімдеді.
"Sarbaz 2.0": Жеңілдіктер қалай беріледі?
Әскери қызметшілерді әлеуметтік қолдау шараларын цифрландыру мақсатында арнайы "Sarbaz 2.0" ақпараттық жүйесі іске қосылған. Бұл платформа мерзімді әскери қызметтегі жастарға білім беру жеңілдіктерін пайдалануға және оқуға түсу үшін өткізілетін конкурстық іріктеуге онлайн режимде қатысуға жағдай жасайды.
"Қызметін аяқтаған азаматтар қолданыстағы қабылдау тәртібіне сәйкес арнайы тестілеуден өтіп, ҰБТ тапсырмай-ақ жоғары оқу орындарына түсе алады", – деп атап өтті Дархан Ахмедиев.
Оқи отырыңыз: "5 айдан бері жалақы алмадым". Михаил Шайдоров неге чемпионға тиесілі қаражатты ала алмай отыр
Жүйенің басты артықшылықтары:
- толық автоматтандыру: Мемлекеттік білім гранттарына үміткерлерді іріктеу үдерісі адам факторынсыз, электронды жүйе арқылы жүзеге асады;
- әділдік пен объективтілік: Платформа үміткерлерді олардың әскери қызметтегі нәтижелері мен жауынгерлік даярлықтағы жетістіктері негізінде бағалайды;
- әлеуметтік қолдау: Ең жоғары көрсеткішке қол жеткізген сарбаздарға тегін білім алу (грант) мүмкіндігі беріліп қана қоймай, жатақханадан міндетті түрде орын ұсынылады;
- цифрлық профиль: Платформа қатысушылардың орталықтандырылған есебін жүргізуге және әрбір әскери қызметшінің жеке цифрлық бейнесін қалыптастыруға мүмкіндік береді.
Қорғаныс министрлігінің мәліметінше, бұл бастама әскери қызметтің беделін арттыруда үлкен рөл атқарып отыр. 2023 жылы іске қосылған "Sarbaz 2.0" жүйесіне бүгінгі күнге дейін 180 мыңнан астам әскери қызметші тіркеліп үлгерген.
Бұл жүйе әскерге баруды тек Отан алдындағы міндет қана емес, сонымен бірге болашақ мамандыққа нық қадам басудың тиімді мүмкіндігіне айналдырып отыр.