Ақтөбе облысының Темір ауданына қарасты Кеңқияқ ауылында бой көтеріп жатқан 600 орындық мектеп құрылысы тұрғындардың шағымдарынан кейін тоқтады. Бұл туралы Samruk-Kazyna Construction басшысы Мәулен Айманбетов хабарлады.
Қазіргі таңда тексеру жүргізу үшін арнайы жұмыс комиссиясы құрылып, зерттеу жүргізіліп жатыр. Алдын ала мәлімет бойынша, мектептің іргетас конструкцияларында жарықтар пайда болған, тірек қабырғалар мен арақабырғаларда сызаттар байқалған. Сонымен қатар бетон монолитті белбеулер мен тірек табандарында құрылыс стандарттарына сәйкес келмейтін кемшіліктер анықталған.
Белгілі болғандай, аталған жайлы мектепті салу үшін өткізілген байқауға бірде-бір құрылыс компаниясы қатыспағандықтан, бұл міндет байқаудан "Самұрық-Қазына Девелопмент" ЖШС-не жүктелген екен.
"Қазақстанның батыс өңірлерінде құрылыс компаниялары мен білікті мамандардың тапшылығы бар екенін атап өткім келеді. Кеңқияқ ауылындағы мектептің техникалық қадағалауын жүргізу үшін конкурстық процедуралар 2023 жылдың 3 қыркүйегінде және 17 қазанында ұйымдастырылды. Алайда өтініш білдіріп, қатысқан компаниялар болмады. Сондықтан биылғы 15 сәуірде техникалық қадағалаушы ретінде ерекше тәртіппен "Самұрық-Қазына Девелопмент" ЖШС бекітілді", – деп түсіндірді Мәулен Айманбетов.
Оқи отырыңыз: 2024 жылы Қазақстанда 208 жайлы мектеп бой көтереді
Samruk-Kazyna Construction АҚ басқарма төрағасының тапсырмасымен анықталған ақаулар бойынша егжей-тегжей тексеріс жұмыстарын жүргізетін арнайы тәуелсіз сарапшылар комиссиясы құрылды. Ол құрылыстың техникалық жағдайын анықтап, келесі қадамдар бойынша өз ұсыныстарын беруге тиіс. Әзірге комиссия бас мердігерге бетонның монолитті белбеуінің беріктігін анықтау мақсатында қосымша зертханалық сынақтарды ұйымдастырып, аккредиттелген тәуелсіз зертхананың құрылыс нысанының техникалық зерттеуі бойынша қорытындысын ұсынуды жүктеген.
Қазіргі таңда зертханалық сынақтар жүргізіліп жатыр. Тексеріс қорытындысы бойынша тірек элементтерін күшейтіп, ақауларды біржақты ету бойынша шаралар кешені әзірленеді. Шаруаны атқаруға астаналық тәжірибелі компания таңдалып алынған. Мамандар тексеріс аяқталысымен іске кіріседі.
