"Алтын белгі" үміткерлеріне талап күшейеді. Енді олардың барлық тоқсандағы пәндер бойынша бағасы "5" болуы керек

Келесі оқу жылынан бастап "Алтын белгі" үміткерлерінің әр тоқсандағы пәндер бойынша бағасы "5" болуы керек. Ал бұған дейін пәндер бойынша тек жылдық баға ескеріліп келген еді. Бұл туралы ҚР Білім және ғылым министрі Асхат Аймағамбетов мәлімдеді. 

"Келесі оқу жылынан бастап "Алтын белгі" үміткерлері үшін талаптар әрі қарай күшейтіледі. Біз мұны жыл сайын кезең-кезеңімен өзгертіп жатырмыз. Оны білесіздер. Алдыңғы жылда болсын бұл мәселені көтердік. Біраз өзгерістер енгіздік. Биыл – екінші кезең. Екінші кезең дегеніміз – үміткерлердің 5-11 сыныптардағы барлық тоқсандағы бағалары "5" болуы керек деген қағида енгізіледі. Өзім мұны маңызды қағида деп санаймын. Сол себепті осындай шешім қабылдап жатырмын. Түлектер үшін емтиханды тәуелсіз ұйым өткізетін болады. Бұл реформа оң нәтижесін береді деп сенемін", – деді министр. 

Мұнымен қатар, Асхат Аймағамбетов барлық өңірдегі мектептердің 100% бейнебақылау жүйесімен қамтылғанына тоқталды. Алайда олардың тек 55%-ы стандарт талаптарына сәйкес келеді. 

"Мектептердің 99,8%-ы жылы әжетханалармен қамтамасыз етілген. Осы жылдың соңына дейін өзіміз келіскендей барлық өңір осы көрсеткішті 100%-ға дейін жеткізуі қажет. Бұған қатысты үлкен жұмыс жасалуда", – деп қосты министр. 

Еске салсақ, Асхат Аймағамбетов ұстаздарды өзіне тиесілі емес жұмысқа тартқан басшылардың қатаң жазаланатынын мәлімдеді. Осы орайда, ол тіпті олардың қызметінен қуылуы мүмкін екенін ескертті.