Қазақстандық лоукостер FlyArystan әуе компаниясы Алматы – Чунцин бағыты бойынша тікелей рейсті іске қосатынын хабарлады. Компания бұл бағыттағы алғашқы рейсін 23 қыркүйекке жоспарлап отыр.
Рейстер аптасына екі рет орындалады. Алматыдан әуе кемесі сәрсенбі және сенбі күндері ұшса, Чунциннен кері рейстер бейсенбі және жексенбі күндері жасалады.
Алматы мен Чунцин арасындағы ұшу ұзақтығы шамамен 5 сағатты құрайды.
Чунцин арқылы Қытайдағы танымал "Аватар тауларына" баруға болады. Сондай-ақ, қала өзінің ерекше көпдеңгейлі сәулетімен және қайталанбас қалалық келбетімен танымал. Оның ең әйгілі көрікті орындарының бірі – тұрғын үй ғимаратының ішінен өтетін метро желісі. Бұл нысан қазіргі Чунциннің басты символдарының біріне айналған.
Әуе компаниясы әзірге билет бағасы қанша болатынын хабарламады.