Алматыда ауыл оқушыларына арналған бірегей жоба – IQanat Олимпиадасының финалы басталды. Оған іріктеу кезеңдерінде 50 мың бала арасынан топ жарған 1000 бала қатысады. Оның аясында оқушылар EQ-тест тапсырады, яғни олардың эмоциялық интеллекті, көшбасшылық жеке қасиеттері де таразыланады.
Олимпиаданы ұйымдастырушылардың айтуынша, қорытынды тестілеудің академиялық бөлігі 80%-ды құраса, қалған 20% бөлігі "жұмсақ" дағдыларға (soft skills) тиесілі болады.
"Біздің міндетіміз – балалардың арасынан ең ақылдыларды емес, сонымен қатар ең ынталы, бастамашыл, көшбасшы оқушыларды іріктеу. Осы үшін қолданысқа EQ-тест енгіздік. Эмоциялық тестілеу оқушының мықты жақтарын, оны кейін қай бағытта дамыту керектігін де айқындап береді", – деді IQanat академиялық директоры Зухра Шегенова.
Олимпиада аясында оқушылар тестілеуге қатысудан бөлек, түрлі семинар, тренинг, ынталандырушы кездесулерге де қатысады. Одан қалды, интерактивті ғылыми тәжірибелер, reading-челлендждер әзірленген. Peer-to-Peer жобасы аясында IQanat түлектері мен жоғары сынып оқушылары олимпиадаға қатысушы оқушылардың білімін толықтыруға көмектеседі.
Еске салайық, олимпиадада үздік нәтижеге ие болған балалар Бурабайдағы IQanat High School of Burabay мектеп-пансионатында тегін білім алады. Грантқа ілінбеген оқушылар IQ ADVANCED тереңдетіп оқу бағдарламасына және IQ-IP үш жылдық бағдарламасына қосылады. Оның аясында балалар жоғары оқу орындарына түсуге онлайн дайындалады.
