Алматы облысының Кеген ауданында ер адамның жанып кеткен мәйіті табылып, қылмыстық іс қозғалды. Бұл туралы Алматы облыстық полиция департаменті хабарлады.
Ведомствоның мәліметінше, 23 маусым күні полицияға таулы аймақтан мәйіт табылғаны туралы хабарлама түскен. Оқиға орнына жедел-тергеу тобы жіберілген.
Тергеу барысында қаза болған адамның жеке басы анықталды. Оның полиция қызметкері болғаны расталды.
Жедел-іздестіру шараларының нәтижесінде қылмысқа қатысы бар деген күдікпен бірнеше адам, оның ішінде марқұмның жұбайы мен ұлы ұсталды. Барлығы уақытша ұстау изоляторына қамалған.
Полицияның хабарлауынша, қылмыс Алматы қаласының аумағында жасалған.
Қазіргі уақытта оқиғаның барлық мән-жайын анықтауға бағытталған кешенді тергеу әрекеттері жүргізіліп жатыр.
"Тергеу мүддесіне байланысты өзге ақпарат жария етілмейді", – деп мәлімдеді полиция департаменті.