Алдағы күндері Қазақстанда 40 градусқа дейін аяз болады

"Қазгидромет" РМК алдағы үш тәулікке арналған ауа райы болжамын жариялады.

Синоптиктердің мәліметінше, ел бойынша ауа температурасы күрт төмендейді.

15 қаңтарда солтүстік және шығыс өңірлерде түнгі уақытта ауа температурасы 30-40 градусқа дейін аязға түседі. Оңтүстік облыстарда түнде 5-13 градус, ал оңтүстік-шығыста 8-17 градус аяз күтіледі. Таулы аймақтарда температура 20-25 градусқа дейін төмендейді.

Сондай-ақ Қазақстанның оңтүстігінде 15-16 қаңтар аралығында негізінен қар түрінде қатты жауын-шашын, жаяу бұрқасын және көктайғақ болжанып отыр. Ал елдің оңтүстік-шығысында 16-17 қаңтар күндері қатты қар, жаяу бұрқасын, тұман және көктайғақ болуы мүмкін.

Мамандар ауа райының қолайсыздығына байланысты тұрғындарды сақтық шараларын күшейтуге, ал жүргізушілерді жолға шықпас бұрын ауа райы мен жол жағдайын ескеруге шақырады.