Airbus 2025 жылы әскери тікұшаққа тапсырыс саны айрықша өскенін хабарлады

Airbus Helicopters компаниясы 2025 жылы тікұшаққа жалпы тапсырыс саны 544-е (оның ішінде таза тапсырыс саны – 536) жеткенін хабарлады. Бұл азаматтық және әскери авиация нарығындағы тұрақты өсімді көрсетеді. 

Жалпы саны 50 елдің 205 компаниясынан тапсырыс түскен. Қазірге дейін Airbus Helicopters 392 тікұшақты тапсырыс иесіне жеткізген. Сонымен қатар, 2025 жылы ұшқышсыз авиациялық жүйелерге (UAS) де сұраныс артқаны байқалады. Тапсырыс саны бойынша Airbus Helicopters азаматтық және мемлекеттік сектор нарығының 51 пайызын иеленсе, ал әскери нарықтағы үлесін 28 пайызға дейін ұлғайтты.

"Техника бірліктері бойынша тапсырыстар көлемінің шамамен 20 пайызға өсуі біздің азаматтық және әскери өнімдер портфеліміз қазіргі күрделі жағдайда нарық талаптарына толық жауап беретінін дәлелдейді. Біз қорғаныс пен қауіпсіздікке бұрын-соңды болмаған деңгейде көңіл бөлудеміз және ұшқышсыз жүйелерге көшу үдерісінде көшбасшы болып отырмыз", – деді Airbus Helicopters компаниясының бас директоры Брюно Эвен.

Оның сөзінше, 2025 жылы ірі мемлекеттік келісімшарттар да жасалды. Мәселен, Испания 100 тікұшаққа тапсырыс берсе, оның ішінде 50 H145M, барлық қарулы күштер үшін 31 NH90 және алғаш рет H175M модельдері бар.

 Германия жаңғырту бағдарламасы аясында қосымша 20 H145M сатып алуға опциясын іске асырып, жалпы санын 82-ге жеткізді. NH90 бағдарламасы да жаңа серпін алды: Нидерландтар тікұшақ паркін үш бірлікке арттырса, Грекия сервистік қызмет көрсетуге келісімшарт жасады. Ал Германия алғашқы NH90 Sea Tiger тікұшағын қабылдады.

Ауыр тікұшақтар сегментінде Super Puma отбасы әмбебаптығын тағы бір мәрте дәлелдеді. Грекия өрт сөндіру мақсатында сегіз H215 тікұшағына тапсырыс берді. H225M моделі бойынша Мароккомен 10 тікұшаққа келісімшарт жасалып, Ирак бұрын тапсырыс берген алғашқы машиналарды қабылдады.

Жеңіл екі қозғалтқышты тікұшақтар сегменті де өсім көрсетті. Испания 13 H135, ал Ұлыбританияның Ұлттық полиция авиация қызметі жеті H135 сатып алды. H145 моделі 149 тапсырыспен азаматтық, мемлекеттік және әскери нарықтардағы ең көп сатылатын тікұшақ мәртебесін тағы растады.

VERTICON 2025 көрмесінде Airbus жаңа буындағы жеңіл екі қозғалтқышты H140 тікұшағын таныстырды. Инновациялық технологиялармен жабдықталған бұл модельге қазірдің өзінде 61 тапсырыс алынған. Сонымен қатар, Racer жобасы бастапқы мақсаттардан асып түсіп, 440 км/сағ крейсерлік жылдамдыққа қол жеткізді.

Компания ұшқышсыз жүйелер бағытын да белсенді дамытып келеді. Survey Copter Airbus негізгі ұсыныстарына біріктіріліп, тактикалық дрондардың толық желісі қалыптастырылды. Drone Forge, Еуропалық теңіз қауіпсіздігі агенттігі Flexrotor жүйесін таңдаса, Франция Қарулы күштері алты VSR700 жүйесіне тапсырыс берді. HTeaming тұжырымдамасы аясында пилотталатын және ұшқышсыз платформалардың өзара әрекеттестігі дамытылуда.

H160 бағдарламасында да технологиялық жетістіктер бар. H160M "Guépard" әскери нұсқасы шілде айында алғашқы ұшуын жасады. H160 моделі орташа екі қозғалтқышты тікұшақтар сегментінің шамамен 50 пайызын иеленіп отыр. Бұл тікұшақ құқық қорғау, өрт сөндіру және энергетика салаларында да қолданыла бастады.

Өсіп отырған сұранысты қамтамасыз ету үшін Airbus Helicopters жаһандық өндірістік қуатын кеңейтуді жалғастыруда. 2025 жылы Үндістанның Карнатака штатындағы Вемагал қаласында H125 тікұшағына арналған жаңа соңғы жинақтау желісінің құрылысы басталды. Ол әлемдегі H125 үшін төртінші FAL болады.

Еске салайық, Қазақстанда жеке компаниялар мен мемлекеттік ұйымдар пайдаланатын 60-тан астам Airbus тікұшағы бар. Airbus Helicopters Kazakhstan Engineering (AHKE) орталығы H125, H130 және H145 тікұшақтарына қызмет көрсету бойынша қызметтер ұсынады, оның ішінде құрастыру, техникалық қызмет көрсету және мамандарды оқыту бар. Компания қызметкерлерінің басым бөлігі – Еуропадағы Airbus кәсіпорындарында оқудан өткен Қазақстан азаматтары.