Аймағамбетов: "Болашақпен" білім беретін ЖОО қатары ресейлік 5-10 университетке артса, бұл қауіп емес, мүмкіндік

Асхат Аймағамбетовтың айтуынша, білім және ғылым министрлігінің алға қойып отырған міндеті – білім сапасын арттырып, осы саланы әрі қарай дамыту.

"Жастардың "Болашақ" бағдарламасының шеңберінде Ресейде білім алатынында ешқандай қауіп жоқ. Қазір аталған бағдарлама шеңберінде студенттеріміз 27 мемлекетте орналасқан 207 университетте оқып жатыр. Егер осы университеттер тізіміне Ресейдің техникалық мамандықтарды оқытатын тағы 5 жоғары оқу орны қосылса, бұл қауіп емес, керісінше балаларға жаңа мүмкіндіктер береді. Ұлыбритания, Америка, Францияның үздік университеттерін ешкім ысырып тастаған жоқ. Президент бізге техникалық мамандар мен осы салада сапалы білім қажеттігін меңзеді", – деп түсіндірді Асхат Аймағамбетов. 

---

Оқи отырыңыз: 

• Тоқаевтың техник мамандарды Ресейде даярлау жөнінде айтқаны неге дау тудырды? Сарапшылар пікірі
• 2022 жылы техникалық мамандықтарға грант саны 40-тан 60 пайызға дейін артады

---

Сондай-ақ, білім және ғылым министрі өткен жылы қазақстандық студенттердің МГУ-не бөлінген 555 гранттың тек бесеуін ғана таңдағанын бөлісті. Осы орайда ол студенттерді Ресейдің ЖОО-ларына тапсыруға мәжбүрлеу болмайтынын айтты. 

"Балаларды жетектеп алып барып, оқысаң да, оқымасаң да, осы университетті таңдайсың дегенді білдірмейді. Талапкер алдымен университетке түсу үшін әрекет жасауы тиіс. Әр жоғары оқу орнының емтиханы, жоғары талаптары бар. Сондай-ақ, мемлекет басшысы тапсырманы арнайы ғылыми зерттеулер нәтижесіне, нарық сұранысына сүйеніп беріп отыр", – деп қосты министр.