"Айбоз" ұлттық әдеби сыйлығына шығармалар қабылдау басталды. Жүлде қоры – 35 млн теңге

Мәдениет және спорт министрлігі "Айбоз" ұлттық әдеби сыйлығына шығармалар қабылдауды бастады. Әдеби сыйлықтың жалпы жүлде қоры – 35 млн теңге.

Әр номинацияға 5 млн теңгеден қарастырылған. Ұлттық сыйлыққа "Үздік проза", "Үздік поэзия", "Үздік драма", "Үздік әдеби аударма", "Үздік балалар әдебиеті", "Үздік әдеби сын", "Үздік комикс" номинациялары бойынша шығармалар қабылданады.

Байқауға отандық қаламгерлер қатыса алады және үміткерлердің жас ерекшелігіне байланысты шектеу жоқ.

"Айбоз" – отандық қаламгерлерге мемлекет тарапынан қолдау көрсету және ынталандыру мақсатында Мәдениет және спорт министрлігі ұйымдастыратын ұлттық әдеби сыйлық. Байқауға бұрын-соңды еш жерде жарияланбаған шығармалар ғана қабылданады. Бұл қазақ әдебиетінің қоры 7 номинация бойынша жүздеген жаңа туындылармен толығады деген сөз. Сондай-ақ қаламгерлер арасында бәсеке пайда болып, соның нәтижесінде оқырманға өзекті, қызықты әрі заманауи шығармалар жол тартады", – деді архив, құжаттама және кітап ісі комитеті Кітап ісі басқармасының басшысы Алмаз Мырзахмет. 

Өтінімдер 1 мамыр – 1 қыркүйек аралығында www.aiboz.kz сайтында қабылданады. Әдеби сыйлық жыл соңында табысталады.