Африкалық саванна, Арктика кешені. Алматының хайуанаттар бағы еуростандарттарға сай жасақталады

Алматының хайуанаттар бағы еуростандарттарға сай жасақталады. Бұл туралы Алматы қаласы өңірлік коммуникациялар қызметінде өткен брифингте Сейілхан Ақылбеков айтты.

Хайуанаттар бағы директорының айтуынша, бақта "Африкалық саванна" кешенін салу жоспарланып отыр.

"Африкалық саванна" жаңа экспозициясында жануарлардың бірнеше түрі ұсталатын болады. Бұл экспозиция жыл бойы жұмыс істейді. Құрылыс-монтаж жұмыстарын 2024 жылға жоспарлап отырмыз. Сондай-ақ, хайуанаттар бағында жалпы аумағы 1,5 гектар болатын "Арктика" кешені салынады", – деді Сейілхан Ақылбеков.

Жоспар бойынша 2030 жылға дейін хайуанаттар бағының жалпы аумағының 70 пайызы реконструкцияланады. Қар барысы мен сілеусінге арналған қоршаулар, жаңа ветеринарлық клиника, жабайы жануарларды реинтродукциялау орталығы жобалары жасалады.