670 тонна сынап қалдығы көмілген Былқылдақ көлі "Павлодар" АЭА аумағынан шығарылады

Павлодар қаласының Солтүстік өнеркәсіп ауданының аумағында орналасқан "Павлодар" арнайы экономикалық аймағы шамамен 3 есе, яғни 3 310 гектардан 1 200 гектарға дейін қысқарады. Бұл туралы Ашық НҚА порталында жарияланған Үкімет қаулысының жобасынан белгілі болды.

Арнайы экономикалық аймақтан шығарылатын территорияны негізінен Былқылдақ көлі алып жатыр. Еске салайық, биыл президент Қасым-Жомарт Тоқаев Павлодар облысына жасаған сапары кезінде Былқылдақ су жинақтаушы көлінің түбінде орасан зор өнеркәсіптік сынап жиналғанын айтқан болатын. Атап айтқанда, көлге 670 тонна сынап қалдығы көмілген.

Үкімет қаулысының жобасында Былқылдық көлін аумағын кәсіпорындарды салу және орналастыру үшін алаң ретінде пайдалануға болмайтындығы жазылған.

"АЭА құрамынан инвестициялық жобаларды орналастыру үшін мүмкін емес аумақты алып тастау ұсынылады, бұл аумақты неғұрлым толық игеру үшін оңтайландыруға мүмкіндік береді" делінген жобада.

---

Оқи отырыңыз: "Атом улаған дала" кітабының авторы: Ядролық сынақ қасіретін халық әлі көріп жатыр

---