2023 жылы қандас мәртебесін алған этникалық қазақтардың тең жартысы Өзбекстаннан келген

2023 жылдың 1 наурыздағы жағдай бойынша 3134 этникалық қазақтар тарихи отанымен табысып, қандас мәртебесін алды, деп хабарлады Еңбек және халықты әлеуметтік қорғау министрлігі.

1991 жылдан бері республикаға 1 миллион 110,1 мың этникалық қазақ оралған.

"Жыл басынан Қазақстанға келген қандастардың жартысы (50,0%) Өзбекстаннан, 16,3% – Қытайдан, 15,9% – Ресейден 8,4% – Түрікменстаннан, 4,5% – Моңғолиядан және 4,9% басқа елдерден. Келген этникалық қазақтар негізінен Алматы (27%), Маңғыстау (16,6%), Түркістан (7,1%) және Жамбыл (3,6%) облыстарына, сондай-ақ Астана (10,5%), Алматы (7,6%) және Шымкент (6,5%) қалаларына қоныстанды" делінген министрліктің хабарламасында.

---

Оқи отырыңыз: 

• Қандас мәртебесін қалай алуға болады? Шеттегі қазақтарға арналған нұсқаулық
• EGov.kz арқылы қандас мәртебесін алуға болады
• Қазақстанға оралған қандас дәрігерлер неге ота жасаудан шеттетіледі?

---

Еңбекке қабілетті жастағы этникалық қоныс аударушылар саны 69,1%-ды, еңбекке қабілетті жастан кіші 22,7%-ды және зейнеткерлер 8,2%-ды құрайды.

Елге келген қандастардың 20,1 пайызы жоғары білімді болса, 40,9 пайызының білімі орта кәсіби,  35,2 пайызының жалпы орта білімі бар және 3,8 пайызының білімі жоқ.