Алматы прокуратурасының үйлестіруімен интимдік қызметтерді жарнамалаған Kizdar.net интернет-ресурсының қызметі тоқтатылып, оны ұйымдастырды деген күдікпен бірнеше адам ұсталды.
Алматы қаласы прокуратурасының мәліметінше, Kizdar.net интернет-ресурсын ұйымдастырушылардың заңсыз қызметіне тосқауыл қойылды.
"Тергеу деректеріне сәйкес, күдіктілер 2011 жылдан бері сайт арқылы интимдік қызметтерді жарнамалап, ақылы негізде қызмет көрсетуді ұйымдастырған. Интернет-ресурстың болжамды ұйымдастырушылары ұсталып, олардың әрекеттері қылмыстық кодекстің 309-бабының 2-бөлігі бойынша сараланған. Сот санкциясымен күдіктілер қамауға алынды", – делінген хабарламада.
Тінту жұмыстары барысында ірі көлемдегі ақша қаражаты, цифрлық активтер, компьютерлік техника және өзге де заттай дәлелдемелер тәркіленген.
Прокуратураның алдын ала мәліметі бойынша, күдіктілердің заңсыз қызметтен тапқан табысы 2 миллиард теңгеден асқан. Қазір қылмыстық іс бойынша тергеу амалдары жалғасып жатыр. Құқық қорғау органдары істің өзге мән-жайларын анықтап жатыр.