БҚО-да 200-ге жуық адамның 180 миллион теңгесін қолды қылған Chia TaiPharmaceutical қаржы пирамидасын ұйымдастырушының кінәсі дәлелденді, деп хабарлайды БҚО прокуратурасы.
Прокуратура мәліметінше, 2022 жылғы қыркүйектен 2023 жылғы сәуір айына дейін Батыс Қазақстан облысы Шыңғырлау ауданының тұрғыны Chia Tai Pharmaceutical қаржы пирамидасына қосылып, оның құрылымдық бөлімшесінде жетекші орынға ие болды.
"Фармацевтикалық зауытқа заңды инвестиция саламыз деген жалған атаумен ол фармацевтикалық кәсіпорын қызметінен жоғары кіріс алуға уәде беріп, салымшылардан заңсыз қаражат тартқан. Оның қылмыстық әрекетінің нәтижесінде 185 жәбірленушіге жалпы сомасы 180 миллион теңгеден астам материалдық шығын келтірілген. Бөрлі аудандық прокуратурасының мемлекеттік айыптаушысының принципті ұстанымын ескере отырып, сотталушының қаржылық пирамиданы құру және басқару, сонымен қатар қылмыстық жолмен алынған ақша мен басқа да мүлікті заңдастыру бойынша кінәсі толық дәлелденді", – делінген хабарламада.
Сот мемлекеттік айыптаушының ұстанымымен келісе отырып, сотталушыны Қазақстан Республикасы Қылмыстық кодексінің 217-баптың 2-бөлігі 2-тармағы (Қаржылық (инвестициялық) пирамиданы құру және басқару), 218-баптың 2-бөлігі 3-тармағында (Қылмыстық жолмен алынған ақшаны және (немесе) өзге мүлікті заңдастыру (жылыстату)) көзделген қылмыстарды жасағаны үшін кінәлі деп тауып,қылмыстық құқық бұзушылықтың жиынтығымен бес жыл мерзімге қаржы ұйымдарында басшы лауазымдарды атқару және қаржы ұйымының қатысушысы болу құқығынан айыра отырып бес жылға бас бостандығынан айыру түріндегі жаза тағайындады.
180 миллион теңгеден астам келтірілген шығын жәбірленушілердің пайдасына толығымен өндірілді.
Сот үкімі заңды күшіне енді.
