Тікелей эфир

18 мамыр күні Қазақстанда "Музейлер түні" халықаралық акциясы өтеді

Музей келушілер үшін түнге дейін ашық болады.

18 мамырда мәдениет және спорт министрлігінің қолдауымен республикалық музейлерде "Музейлер түні" халықаралық акциясы өтеді. Бұл туралы мәдениет және спорт министрлігінің баспасөз қызметі хабарлады.

Акция аясында тақырыптық көрмелер, экскурсиялар, дәрістер және тағы басқа іс-шаралар ұйымдастырылады. Музейлер келушілер үшін түнге дейін ашық болады. 

"Қазақстандық музейлер бірнеше жылдан бері ICOM халықаралық музей кеңесінің қолдауымен өткізіліп келе жатқан осы халықаралық акцияға белсенді қатысып келеді. Қазіргі уақытта елімізде 260-тан астам музей жұмыс істейді. Әрбір музей акция аясында өзінің ерекше бағдарламасын өткізеді. "Музей түні"  еліміздің мәдени мұрасы мен өнеріне деген қызығушылығын арттыруға көмектесетініне сенімдімін", – деді мәдениет және спорт вице-министрі Нұрғиса Дәуешов.

Дәстүрлі акция биыл халықаралық музей күніне орай ұйымдастырылған. 

Астанадағы ұлттық музейде акция сағат 18:00-де басталады. Еліміздің ең үлкен музейде басылымдар мен "Алматы-кітап"  баспасы кітаптарының көрмесі, "Тарихи тұлғалар: қуыршақ бейнесінде" авторлық қуыршақтар көрмесі, театрландырылған экскурсиялар, қолөнершілер жәрмеңкесі, ғылыми дәрістер, концерттік және ойын-сауық бағдарламалары өтеді. "Жұлдызды гид" жобасы аясында көрнекті тарихшылар, блогерлер және басқа да танымал тұлғалар келушілерді экспонаттарымен таныстырады.

Алматыдағы Әбілхан Қастеев атындағы мемлекеттік өнер музейінде концерттік бағдарлама мен шеберлік сабақтары, сонымен қатар музей қорынан медицина қызметкерлерінің еңбегіне арналған "Емдеу өнері" атты өнер туындыларының көрмесі өтеді.

Орталық мемлекеттік музейі белгілі отандық суретшілердің қатысуымен "Ұлттық мұра – ұрпаққа аманат" пленэрін өткізеді.


Оқи отырыңыз: Қазақстанға Мұхаммед пайғамбардың өмірін бейнелейтін көшпелі музей келеді


Семей қаласының облыстық тарихи-өлкетану музейі биыл ұлттық қолөнер мен ойындарға ерекше назар аударып отыр. "Ботай" мемлекеттік тарихи-мәдени мұражай-қорығы "Ботай пырағы – 2023" фестивалін өткізеді. Фестиваль аясында атпен серуендеу, ұлттық спорт түрлері бойынша жарыстар, шеберлік сыныптары, кәдесыйлар жәрмеңкесі, концерттік бағдарлама және тағы басқалар өтеді.

Мұхтар Әуезов атындағы Қазақ ұлттық драма театрының музейінде көрнекті өнер қайраткерлерінің портреттерінің көрмесі өтеді.

Бұл мақала сізге пайдалы болды ма?
0

  Егер мәтінде қате болса, оны белгілеп, Ctrl+Enter батырмасын басыңыз

  Егер мәтіндегі қатені смартфонда көрсеңіз, оны белгілеп, «Қатені хабарлау» батырмасын басыңыз

Біздің Telegram-каналдағы ең көп оқылған жаңалықтар
Серіктестер жаңалықтары