Қыс мезгілінің аяқталуына бір ай қалды. Осы уақытты отбасымен, достармен қалай қызықты етіп өткізуге болады? Мысалы, Алматы маңындағы шағын Текелі қаласында қысқы демалысқа арналған бірқатар қызықты орындар бар.
Жалғыз аяқ жолдармен серуендеу
Кеңес заманында бұл жерде КСРО-дағы ең ірі қорғасын-мырыш комбинаттарының бірі болған. Ұлы Отан соғысы кезінде әрбір сегізінші оқтың қорғасыны осында құйылды. Бүгінде бұл Жетісу облысындағы облыстық маңызы бар қала, мұнда 30 мыңға жуық адам тұрады.
Текеліде қысқы серуендеуге арналған көптеген орындар бар.
Қала Жоңғар Алатауының етегінде, Қаратал өзенінің жоғарғы ағысында орналасқан. Текеліден Қытай шекарасына дейін созылып жатқан Қора шатқалы бар. Шатқалдың ортаңғы бөлігінде Орталық Азиядағы ең биік сарқырамалардың бірі – Бұрхан-Бұлақ орналасқан. 4 каскадтың жалпы биіктігі – 168 метр.
Қасиетті жерлер
Қора шатқалының кіреберісінде "Әулие тас" деп аталатын үлкен қойтас жатыр. Аңыз бойынша, баяғыда қатты жер сілкінісі кезінде бұл тас жаңа туған нәрестесі бар әйелді қорғап қалған. Содан бері кейбір адамдар бұл қойтасқа барып, отбасына бақыт, байлық немесе бала сұрайтын көрінеді. Жергілікті тұрғындар арасында бала сүйе алмай жүрген әйелдер тасқа жабысып, нәтижесінде сау сәбилер туады деген сенім бар.
Оқи отырыңыз: Кабирханның иесі: "Жеңіске жеткенде ұлды болғандай қуандым". Америкадан Қазақстанға келген ат қалай ең жүйрік тұлпар атанды
Шатқалдың кіреберісіндегі тағы бір таста буддистік ступаның (буддистердің ғибадат ғимараты) ойылған бейнесі бар. Тастың төменгі жағында басы айдаһарға, денесі арыстанға ұқсайтын мифологиялық жануар бейнеленген.
Қазақстандық археолог Зейнолла Самашевтің болжамынша, бұл жерде IX-XI ғасырларда буддизмді ұстанушылардың тазару рәсімдері өткен. Археологтар шатқалда әлі де көптеген шешілмеген құпиялар бар деп сенеді.
Текелі мен жақын ауылдарда төрт мешіт жұмыс істеп тұр. Сондай-ақ 1992 жылы қалада православие өкілдеріне арнап шіркеу ашылды.
Шаңғы теуіп, парапланмен ұшу
Текелі қаласынан 10-15 минуттық жердегі Екпінді ауылында керемет беткейлері бар демалыс базасы орналасқан, онда шаңғы тебуге (түнде де), шана мен тюбинг трассаларында сырғанауға, атпен серуендеуге және парапланмен ұшуға болады.
Жергілікті аэроплан клубында қыс мезгілі ұшып үйренуге ең қолайлы және қауіпсіз уақыт екенін айтады. Ұшу биіктігі – 200-400 метр. Нұсқаушылардың айтуынша, ұшу орны "желге қарай" орналасқан, ұшыру алаңы ыңғайлы ұйымдастырылған.
Фото @tau_zhetysu инстаграм парақшасынан алынды
Жыл сайын Екпіндіде парапланерлік қону дәлдігі спортынан қысқы чемпионат өтеді. Биыл ол 22 ақпанға жоспарланған, әрбір демалушы осы оқиғаның куәгері бола алады. Ал жазда бұл жерге әлемнің түкпір-түкпірінен ұшқыштар халықаралық жарыстарға келеді. Жаңадан бастаушылар үшін нұсқаушымен бірге парапланмен ұшу 15 мың теңгені құрайды, ал жергілікті қонақүйде 10-18 мың теңгеге бөлме алуға болады.
Оқи отырыңыз: Алматыда 123 жыл тарихы бар ғимарат неге бұзылып жатыр?
