"Астана Опера" театры елордада тегін концерттер береді. Қойылымдар кестесі

Мәдениет және спорт министрлігі мен Нұр-Сұлтан қаласы әкімдігінің көмегімен "Астана Опера" театрының труппасы ашық аспан астында 10-ға жуық тегін концерт береді. Елорда тұрғындары мен қонақтары қала алаңдары – Мәмбетов көшесіндегі Аффари бизнес орталығының алды мен Орталық қалалық саябақтағы амфитеатр сахнасында асқақ өнермен қауыша алады, деп хабарлады театрдың баспасөз қызметі.

Мәмбетов көшесіндегі Аффари бизнес орталығының алды:

• 13, 19 маусым, сағат 12:00. "Балалар сыйға тартқан өнер" концерті;
• 13 маусым, сағат 20:00. "Вокалдық музыка жауһарлары" концерті.

Орталық қалалық саябақтағы амфитеатр:

• 12-13 маусым, сағат 20:00. "Жылдың сегіз мезгілі" концерті;
• 26, 27 маусым, сағат 20:00. Опера-гала (опералық ариялар мен дуэттер, аспаптық әрі хорға арналған шығармалар);
• 5 шілде, сағат 20:00. "Дон Паскуале" екі бөлімді драма-буффасы;
• 6 шілде. Мерекелік Гала-концерт.

---

Оқи отырыңыз: "Астана Опера" үрмелі аспаптар квартеті халықаралық байқауда жеңіске жетті

---

"Шығармашылық ұжымымыз алғаш рет ашық алаңда өнер көрсеткелі тұрған жоқ. Жыл сайын Дж.Вердидің "Аида" операсы сынды ғаламат спектакльдерді ашық аспан астында орындап жүрміз. Осындай жобалар ағартушылық сипатта жасалып, қазақстандықтарды асқақ өнерге тартуға бағдарланған. Жанға жайлы әрі мерекелік көңіл-күй сыйлаймыз деген сенімдеміз. Бірқатар тосынсый әзірледік, олардың бірі – Италия, Швейцария, Жапония, Ресей мен Чехиядан келген шетелдік әртістердің өнер көрсетуі, –  деді "Астана Опера" театрының директоры, Қазақстанның еңбек сіңірген қайраткері Ғалым Ахмедьяров.

Концерттердің бағдарламасы ересектерге де, балалар аудиториясына да қызықты болатындай етіп ойластырылған.