Биыл қаланың шұрқ тесілген көшелеріне ағымдағы жөндеу жұмыстары жүргізіледі. 250 мың м2 асфальтбетон жабындысы төселеді және 40 аялдаманың "қалтасы" ретке келтіріледі деп жоспарлануда. Бұл туралы Алматы әкімдігінің баспасөз қызметі хаарлады.
"Қазір көшенің ойылған жерлерін жөндеу жұмыстары бірінші кезекте магистральды көшелерде жүргізілуде. Кейін біртіндеп аудандық маңызы бар көшелерге ауысатын болады. Ағымдағы жөндеу жұмыстары аудандық әкімдіктердің өтініштері, Полиция департаментінің, Open Almaty және басқа ұйымдар берген ұйғарымдар бойынша анықталған жағдайда тұрақты жүреді", – делінген хабарламада.
Оқи отырыңыз: Алматының 600 көшесінде жарық пайда болады
Биыл ағымдағы жөндеу жұмыстарын жүргізу үшін 162 жұмыс орны құрылған. Құрылысқа 16 бригада және 45 арнайы техника бірлігі жұмылдырылды.
Қыста көше-жол жабынындағы ақаулар суық асфальтбетон қоспасын төсеу арқылы уақытша жөнделеді. Кейін көктем-жаз маусымында ыстық асфальтбетон төселеді. Қоспаның орташа тәуліктік температурасы +10, құрғақ негізде іске асады.
Жалпы, Алматы қаласында көше-жол желісінің ұзындығы – 3 096,8 шақырым. Көше саны – 2 746:
- магистральды маңызы бар көше саны – 385 (ұзындығы 1150 шақырым);
- жергілікті маңызы бар көше саны – 2361 (ұзындығы 1946,8 шақырым).
