Алматы метрополитені жетондардан бас тартып, қағаз билеттерге көшетінін хабарлады.

Турникеттердің жаңартылуына байланысты кей станцияларда кезек пайда болған. Жаңа құрылғылар QR-коды бар қағаз билеттерді қабылдайды, сондай-ақ банк карталары, Apple Pay және Samsung Pay арқылы төлем жасауға мүмкіндік береді.

"Жетондардан бас тарту бірнеше себепке байланысты. Атап айтқанда, механикалық бөлшектердің жиі істен шығуы, жөндеу қажеттілігі, қосалқы бөлшектердің қымбаттығы және "Оңай" мен Avtobys көлік жүйелерімен QR-код арқылы біріктіру мүмкіндігі бұл шешімге негіз болған", – делінген хабарламада.

Алматы метрополитені турникеттердің жартысынан астамын жаңғыртып үлгергенін хабарлады.

QR-кодты және жетондарды оқу уақыты бірдей. Қазіргі таңда мамандар жабдықтардың жұмысын тұрақты бақылап, туындаған ақауларды жедел түрде түзетіп жатыр. Сондай-ақ қағаз билеттер барлық станцияларда бір реттік сапар үшін қолданылады. Егер жолаушы басқа тәсілмен төлем жасай алмаса, дәл осы билет түрін пайдалана алады.

Оқи отырыңыз: Алматыда метроның "Достық", "Сарыарқа" бекеттері бітпей жатып, "Қалқаманның" құрылысы басталды