Үндістанның 12 штатында үй шаруасымен айналысатын 118 миллион әйелге мемлекет тарапынан тұрақты ақшалай төлем қарастырылған. Әйелдердің еңбегін мойындауға және оларды әлеуметтік тұрғыда қолдауға бағытталған бұл бастама әлемдегі ең ауқымды әлеуметтік эксперименттердің біріне айналды, деп хабарлайды BBC.

Үндістанның орталық бөлігінде орналасқан Мадхья-Прадеш штатындағы шағын елді мекенде тұратын Премила Бхалави ресми жұмыссыз болса да, ай сайын үкіметтен арнайы жәрдемақы алып отыр. Оның айтуынша, 1500 рупия (шамамен 16 АҚШ доллары) дәрі-дәрмекке, азық-түлікке және ұлының оқу шығындарын өтеуге жеткілікті.

Алайда бұл төлем Премила үшін тек қаржылай көмек қана емес. Ол тұрақты табыстың болуы өз өмірін жоспарлауға, еркіндік пен тәуелсіздік сезімін сезінуге мүмкіндік бергенін айтады. Мұндай қолдау оның күнделікті тұрмыс-тіршілігіне оң өзгеріс әкелген.

Оқи отырыңыз: 2026 жылы медициналық сақтандыру жүйесінде не өзгереді

Қазіргі таңда осындай жәрдемақыны Үндістанның 12 штатында миллиондаған әйел алып отыр. Осы арқылы ел билігі үй шаруасын жүргізу, отбасы мүшелеріне күтім жасау және қоғамдық өмірге қатысу сияқты еңбектерді ресми түрде мойындап отыр.

Бұған дейін Үндістан үкіметі халықты негізінен азық-түлік, отын және ауыл шаруашылығы өнімдеріне арналған субсидиялар арқылы қолдап келген. Ал жаңа бағдарлама аясында белгілі бір жастағы, табысы төмен әйелдерге тікелей ақшалай төлем жасалады. Бұл ретте мемлекеттік қызметкерлер, салық төлеушілер, көлік иелері мен ірі жер телімдеріне ие отбасылар бағдарламаға қатыстырылмайды.

Лондондағы Корольдік колледждің құқық және әлеуметтік әділеттілік профессоры Прабха Котисваранның айтуынша, бұл бастама Үндістандағы әйелдерге арналған әлеуметтік қолдау жүйесінің айтарлықтай кеңейгенін көрсетеді.

Мамандар бұл тәжірибе болашақта өзге елдер үшін де үлгі болуы мүмкін екенін атап өтеді.