Су тасқынынан зардап шеккен өңірлердегі мектеп түлектерін қолдау мақсатында мемлекеттік білім беру тапсырысының 20 пайызы мөлшерінде гранттарды квоталау бойынша шаралар қабылданып жатыр. Гранты саны – 12 528. 

Бұл туралы Үкімет басшысы Олжас Бектеновтің Сенат депутаттарының сауалына берген жауабынан белгілі болды. 

"Су тасқынынан зардап шеккен мектеп түлектерін қолдау мақсатында мемлекеттік білім беру тапсырысының жалпы көлемінен 20 % (немесе 12528 грант) мөлшерінде гранттарды квоталау бойынша шаралар қабылдануда, бұл олардың толық қамтылуын қамтамасыз етеді және даярлықтың барлық бағыттары бойынша конкурсқа қатысуға мүмкіндік береді", – делінген Олжас Бектеновтің жауабында. 

Оқи отырыңыз: 217 әкімшілік қаулы: Су басқан өңірлерде кәсіпкерлер азық-түлік бағасын заңсыз көтерген

Үкімет басшысының айтуынша, ҰБТ-ға дайындық барысында Ұлттық тестілеу орталығының өкілдері ақпараттық-түсіндіру жұмыстарын, оның ішінде өтініштерді тіркеу кезінде жеке кабинет арқылы түлектерді сүйемелдеу жүргізіледі. ҰБТ-ның ақылы онлайн-сынақ тестілері ұйымдастырылған. 

"ҰБТ-ға дайындыққа онлайн-курстар, сабақтар, консультациялар өткізетін еліміздің үздік педагогтары тартылды. Білімді бекіту үшін бұл сабақтар мен курстар prob-ent.testcenter.kz, dating.online, ent.5plus.kz, testter.kz, itest.kz, Bilimland платформаларында қолжетімді. Түлектерді, ата-аналарды, педагогтерді психологиялық сүйемелдеу жүзеге асырылады", – деді Олжас Бектенов.