Семейде 66 жастағы тұрғын учаскелік полицияға тиесілі екі көлікті өртеді. Әлеуметтік желіде тараған видеода ер адамның көліктерге бензин шашып, оларға от жағуы көрінеді.

Куәгерлердің айтуынша, жанып кеткен көліктер Chevrolet Cobalt және Changan қызметтік көліктері болып шықты, бұл ақпарат облыстық полиция департаменті тарапынан расталды.

Полиция мәліметінше, оқиға 25 қаңтар күні сағат 18:10 шамасында болды.

"Күдікті мас күйінде көліктерге от қойған. Қазіргі таңда сотқа дейінгі тергеу басталып, ер адам уақытша ұстау изоляторына қамалды. Қылмыстық кодекс бойынша бөтеннің мүлкін қасақана жою немесе бүлдіру үшін 12 975 000 – 30 275 000 теңгеге дейінгі айыппұл салу, сол мөлшерде түзеу жұмыстарына тарту немесе үш жылдан жеті жылға дейін бас бостандығынан айыру қарастырылған", – делінген хабарламада.

Оқи отырыңыз: "Жар іздеймін". Полиция Threads желісіндегі танысу жазбаларына қатысты ескерту жасады